Што се случува на првата сесија?

Првата сесија е можност за запознавање. Клиентот добива прашања поврзани со причината за јавување кај психолог, тековните грижи, личната историја и што сака да постигне со психолошкото советување. Се поставуваат почетните работни цели и се одредува начинот на работа.

Колку често се одржуваат сесиите?

Фреквенцијата на сесиите зависи од потребите на клиентот. Најчесто, работната динамика е сочинета од една сесија во неделата. Доколку се увиди и се процени инаква потреба за клиентот, се разговара за нов план за почесто или поретко одржување на сесии.

Дали разговорите се доверливи?

Да. Сè што споделувате во разговорите е строго доверливо. Единствени исклучоци се ситуациите кога постои ризик од сериозна штета за клиентот или за некој друг, за што јасно се разговара на сесиите.

Што ако се чувствувам нервозно или несигурно?

Сосема е нормално клиентите да се чувствуваат нервозно или несигурно на почетокот. Започнувањето на советодавниот процес е храбар чекор и во ред е да не се знаат сите одговори на почетокот. Улогата на психологот е да создаде безбеден и поддржувачки простор каде што секој клиент ќе се чувствува слушнат и виден, и ќе биде третиран без осудување.

Кое е работното време, дали може да се закаже сесија за викенд?

Работното време на психолошкото советувалиште е секој ден од 12 до 20 часот, во зависност од Вашиот избран термин.

Колку трае една сесија?

Индивидуалното психолошко советување трае 50 минути. Партнерското психолошко советување трае 90 минути.

Психолог Маријана | Психолошко Советување Охрид

Ако барате психолошка помош и поддршка за вашето дете во Охрид, достапни се професионални услуги за психолошко советување и психотерапија за деца и адолесценти. Терапијата нуди сигурен простор за децата и младите, каде што можат да разговараат и да научат како да се справат со проблемите, без разлика дали станува збор за ментални, бихејвиорални и/или здравствени проблеми.

Во работата детскиот психолог користи интегративен пристап или комбинирани техники произлезени од: уметничка (арт) терапија, когнитивно-бихејвиорална терапија (КБТ), психодинамска терапија, семејна терапија, окупациона терапија итн.

Психолошките проблеми што ги засегаат децата честопати се третираат различно од возрасните поради индивидуалните потреби на детето, возраста, когнитивните нивоа и зрелоста. Во одредени случаи, психологот може да работи исклучиво со родителите (или старателите) за да им помогне во зајакнувањето на родителските вештини и во справувањето со однесувањето на детето.

Дали моето дете треба да посети психолог?

Децата не умеат со зборови да кажат дека им е тешко и дека се соочуват со некаков проблем, па тешкотиите ги изразуваат преку однесувањето, емоциите или телесни симптоми. Проблемите на децата и адолесцентите можат да произлегуваат од неисполнување на базичните психолошки потреби, а како последица можат да се појават анксиозност, повлекување, агресија, намален училиштен успех, проблеми во спиењето и многу други реакции.

Кога да побарам помош?

Размислете за консултација со психолог ако забележите дека вашето дете: поминува низ голема животна промена или стресен настан (преселба, развод, промена на училиште); доживеало траума, загуба или малтретирање; има изразена анксиозност, тага, се повлекува или има испади на лутина; пројавува насилно или ризично однесување; има потешкотии во социјални ситуации и во одржување на пријателства; пројавува видливи промени во однесувањето; има проблеми во училиште или намален училиштен успех; се бори со ниска самодоверба и изразена самокритичност; тешко му е да зборува за чувствата и му треба емоционална поддршка.

за кого е наменето психолошкото советување

Работата со психолог може да помогне при:
анксиозност, депресија, фобии, панични напади; АДХД, потешкотии во учењето, дислексија; агресивно однесување; булинг (жртва или насилник); тага, загуба и процес на жалење; проблеми со самодоверба, идентитет или слика за телото; проблеми во односите со родители или врсници; нарушувања во исхраната; нарушувања во спиењето (несоница, кошмари); соочување со развод на родители или други семејни промени; злоупотреба (физичка, емоционална, сексуална); адаптација на ново училиште или средина итн.

Ако промените во расположението и/или однесувањето на детето траат подолг период (најмалку две недели) и го нарушуваат неговото секојдневно функционирање, ако детето мисли дека не сака да постои или зборува за смрт и самоповредување, побарајте помош!